La scoula cumünela da Schlarigna consista our da la scoulina (2 ans) ed our da la scoula primara (1. fin 6. classa). In üna infrastructura moderna sun las premissas ideelas per imprender. La grandezza da las classas variescha traunter 10 e 20 scolars.
La magistraglia, chi instruescha daspö ans e decennis a Schlarigna, consista our da ses magisters da classa, d’üna magistra da scouletta, da duos pedagogas currativas ed our da differentas magistras da religiun.
Nossa scoula es daspö avuost 2006 bilingua, que voul dir cha’ls iffaunts haun l’occasiun d’imprender già in scoulina las duos linguas rumauntsch (idiom putèr) e tudas-ch.
Scoulina
La scoulina ho duos classas chi sun missas insembel our d’iffaunts dal prüm e dal seguond an. Las mussedras vegnan sustgnidas d’üna accumpagnedra da lingua rumauntscha.
Scoula primara
I’ls prüms ses ans da la scoula primara vegnan instruieus 65 fin 75 % dals rams in lingua rumauntscha e 25 fin 35 % in lingua tudas-cha. Per mincha classa es respunsabel ün magister da classa. In 2. fin 6. classa vain il ram scouletta instruieu d’üna magistra da rams speciels.
Classa pitschna integreda
Scolars e scolaras cun difficulteds d’imprender sun integros in lur classa d’eted. In tscherts rams vegnan quels iffaunts sustgnieus da pedagogas currativas.
S-chelin ot
Il s-chelin ot (scoula reela e secundara) as rechatta a Samedan. Ils scolars e las scolaras vegnan transportos culs mezs publics (bus, tren)
In vicinanza as rechattan trais scoulas medias privatas: l’Academia Engiadina a Samedan, il Lyceum Alpinum a Zuoz e’l Institut Otalpin a Ftan.
La scolaziun da noss iffaunts ans es fich important. La magistraglia cun lur experienza es motiveda d’instruir illas classas – ella garantescha per ün’instrucziun interessanta e moderna. Ils iffaunts haun a Schlarigna la pussibilted da crescher sü pluriling – üna schanza chi nu vain spüerta in bgers lös ...
|
