Ün di reguler
Mincha classa ho ün urari individuel: l’instrucziun cumainza il pü bod a las 07.45 e düra il pü tard fin a las 11.55. Il zievamezdi cumainza l’instrucziun il pü bod a las 14.00 e düra fin il pü tard a las 16.30. Il marculdi zievamezdi haun tuot ils scolars liber.
Düraunt las posas faun ils magisters da classa la survagliaunza, aunz e zieva scoula surpiglian ils genituors la respunsabilted per lur iffaunts.
Lezchas
Las lezchas giouvan üna granda rolla. Ils genituors sun respunsabels cha quellas vegnan fattas.
Attestats
Las prestaziuns scolasticas vegnan valütedas dal magister da classa duos voutas l’an. La fin dal prüm semester scriva il magister da classa ün rapport d’imprender. Ils genituors vegnan invidos ad ün discuors persunel per discuter quel. La fin dal seguond semester survegnan ils scolars ün attestat cun notas.
Classa pitschna integreda (cpi)
La cpi ho il böt da promouver a scolars cun difficulteds d’imprender. Pels rams principels banduna il scolar la classa e vain promovieu d’üna pedagoga currativa. Aunz cu pudair visiter lecziuns da cpi stu il scolar gnir sclerieu dal psicolog da scoula. Ils genituors stöglian esser perinclets. Il magister da classa infurmescha ils genituors scha lur iffaunt ho difficulteds da seguir a l’instrucziun.
Müder illas scoulas pü otas
La scoulina (2 ans) e la scoula primara (6 ans) haun lö a Schlarigna. Zieva la 6. classa müdan ils scolars il s-chelin (scoula reela u secundara) e vaun a Samedan a scoula. Ils scolars haun eir la pussibilted da fer ün examen d’admissiun pel gimnasi.
Assimilaziun
Scolars chi vegnan a ster nouv a Schlarigna e chi nu discuorran rumauntsch haun la pussiblited d’imprender quella lingua in lecziuns d’assimilaziun. L’instrucziun d’assimilaziun es regleda dal chantun e düra per ün temp limito.
Üsaunzas
Scu in otras culturas ho eir Schlarigna sias üsaunzas. Pels scolars da Schlarigna sun obligatoricas: Chanter suot las fnestras (24.12.) e Chalandamarz (01.03). Las prouvas per quistas duos occurrenzas haun per part lö i’l temp liber.
|
