arcumander quista paginaemailFacebookTwitter

Infurmaziuns per nouvs abitants

Schlarigna dispuona d’üna scoula bilingua. Las duos linguas, rumauntsch (puter) e tudas-ch, vegnan instruidas in nossa scoula a partir da la scoulina, cul böt da savair listess bain amenduos linguas fin in 9 evla classa.

Decuors dal di
Tuot las classas da la scoula haun ün urari individuel chi cumainza il pü bod a las 07.40 h e düra fin il pü tard a las  12.00 h. Il zievamezdi cumainza l’instrucziun a las 14.00 h e düra fin il pü tard a las 16.35 h. Il marculdi zievamezdi es liber.
Düraunt l’instrucziun e las posas staun ils scolars suot la survagliaunza da las persunas d’instrucziun. Dadour il temp da scoula sun ils genituors respunsabels per lur iffaunts.

Maisa da mezdi

La scoula primara da Schlarigna spordscha pels iffaunts da la scoulina fin tar la 6 evla classa üna  survagliaunza dals iffaunts da las 11.55 - las 13.55. Ils cuosts per la survgliaunza inclusiv gianter importan 15.- mincha vouta. 

Lezchas
Las lezchas fuorman a partir da la 1. classa üna part importanta da l’instrucziun. Ils genituors sun respunsabels da controller cha lur iffaunts fatschan las lezchas.

Attestats
Las prestaziuns scolasticas dals scolars vegnan valütedas üna vouta l’an dal magister/da la magistra da classa.  A la fin dal prüm semester survegnan ils iffaunts da la 1. e da la 2. classa ün rapport davart l’imprender chi vain discus in ün discuors persunel culs genituors. A la fin dal 2. semester vain distribuieu ün attestat cun notas. Ils iffaunts da la 3. fin a la 6. classa survegnan a la fin da mincha semester ün attestat cun notas.

Promoziun integrativa (IF)
La scoula d’hozindi es üna scoula da la varieted, causa ch’ella dess satisfer a la diversited dad iffaunts a reguard il stedi dal svilup e las premissas per imprender scu eir il fuonz familier e culturel.   Illas classas reguleras vain cumpenseda üna part da l’eterogenited tres las spüertas d’instrucziun da la persuna d’instrucziun da la classa. La classa regulera es perque il lö primar da la promoziun.   

La promoziun integrativa cumplettescha u rimplazza l’instrucziun regulera in situaziuns, illas quelas tschertas spüertas da la classa regulera rivan a cunfins e’ls bsögns particulers da scolaras e scolars nu paun gnir accumplieus. Per quel intent vegnan las persunas d’instrucziun sustgnidas da pedagogas curativas da scoula (SHP). Que po esser il cas tar iffaunts cun difficulteds in scoula, disturbis d’imprender, deblezzas da prestaziun parzielas  (deblezza da ler e d’ortografia u deblezza in fer quints),  singulariteds i’l cumportamaint u eir tar iffaunts cun talents speciels.

Admissiun in scoulas cuntinuantas
Ils iffaunts frequaintan la „scoulina“ e la 1. fin 6. classa a Schlarigna.  Zieva la 6. classa segua la müdeda illa scoula dal s-chelin ot a Samedan. Impü exista la pussiblited d’absolver l’examen d’amissiun per frequenter il gimnasi.

Assimilaziun
L’instrucziun d‘assimilaziun es per iffaunts chi vegnan a ster a Schlarigna e chi nu saun üna u eir tuottas duos linguas ufficielas da scoula (rumauntsch/tudas-ch). L’instrucziun d’assimilaziun es regleda tenor la ledscha da scoula ed es limiteda temporelmaing.

Üsaunzas
Scu las otras culturas ho eir Schlarigna sias üsaunzas. Obligatoric pels scolars da Schlarigna sun: Chanter suot las fnestras (24 december) e Chalandamarz (1. marz). Quistas duos occurrenzas paun avair per conseguenza lecziuns supplementeras.

Contacts
In cas da problems da scoula:
Per plaschair contacter il prüm la persuna d’instrucziun da classa respunsabla. In cas da dumandas davart la scoula:

  • Armon Taisch, mneder da scoula Schlarigna
    Tel. 081 833 18 01
  • Seraina Potera,  presidenta dal cussagl da scoula
    Tel. 079 484 32 79


Per dumandas generelas:

  • Chanzlia cumünela Schlarigna
    Tel. 081 837 36 80

Uras d’avertüra dal fnestrigl:

  • 09.00 – 11.30 e 14.30 – 17.00