arcumander quista paginaemailFacebookTwitter

Promoziun integrativa

Promoziun integrativa (Pin)

Promoziun integrativa scu prevenziun (Pin-p)
Tuot ils iffaunts da la scoulina e da la scoula primara chi staun gnir sustgnieus in lur möd d’imprender u in lur cuntgnair, paun profiter da quista promoziun in möd spert ed evidaint.

Promoziun integrativa sainza adattaziun dals böts d’imprender (Pin-s)

Quista promoziun düra ün temp pü lung, e vain buna impustüt ad iffaunts chi haun üna deblezza da ler e scriver (legastenia), in matematica (discalculia) u chi daun in ögl cun lur cuntgnair.

Promoziun integrativa cun adattaziun d’imprender (Pin-c)
Ella sustegna scolaras e scolars chi haun ün disturbi cumplex d’imprender e/u chi faun grandas difficulteds cun lur cuntgnair.

Scoula speciela integrativa (SSI)
Ella promouva il sustegn ela scolaziun d’iffaunts chi nu sun capabels da seguir l’instrucziun adonta da las imsüras manzunedas survart.

Promoziun d’iffaunts talentos
Ella promouva a scolaras e scolars cun talents extraordinaris, cun granda creativited e motivaziun. La promoziun d’iffaunts talentos es organiseda regiunelmaing a San Murezzan e cumpiglia ün mez di l’eivna.

Promoziun da talents
Tuot ils iffaunts possedan duns chi sun degns da gnir promovieus. Perque offra la scoula primara da Schlarigna spüertas multifarias per l’intera scoula, per singulas classas u eir per gruppas da scolaras e scolars : eivnas da proget, staunza da resursas, lavur libra, compacting, work-shops,…

Logopedia
Illa terapia da logopedia vegnan trattos iffaunts da la scoulina e da la scoula  chi haun ün disturbi linguistic u ün impedimaint d’udida e  tres que capaciteds restrettas da comunicaziun.

Terapia psicomotorica
Cun quista terapia vegnan trattos iffaunts da scoulina e da scoula cun disturbis psicomotorics. Ils böts sun: promouver ün sentimaint corporel positiv, ün svilup perceptiv ed üna consolidaziun da la fiduzcha in se stess.

Promoziun per iffaunts da lingua estra (assimilaziun)

Quista promoziun dess sustgnair l’integraziun immediata illa scoulina u illa scoula primara.  Ils iffaunts vegnan integros dal prinzipi davent illa classa, vegnan però speratiers auncha promovieus  intensivamaing illas duos linguas d’instrucziun (rumauntsch/tudas-ch) da la magistra per sustegn linguistic, duonna C. Simonelli.

La promoziun per iffaunts da lingua estra ho per regla lö düraunt il temp reguler d’instrucziun. Il pensum vain adatto a las capaciteds dals iffaunts ed es al principi intensiv. Sül s-chelin da la scoula primara as tratta que da 5 fin 10 lecziuns l’eivna ed in scoulina sun que 2 lecziuns. Tuot tenor l’intensited da l’instrucziun e dal progress dals iffaunts as po zieva ca. ses mais  redüer pass a pass il numer da lecziuns.

Il pü tard zieva duos ans esi previss da glivrer cul sustegn linguistic. La premissa es, cha l’iffaunt saja capabel da s’exprimer e da seguir  l’instrucziun illa classa. Sur da la düreda da la promoziun linguistica decida il cussagl da scoula insembel cullas persunas d’instrucziun.