arcumander quista paginaemailFacebookTwitter

Scoulina

Stimos genituors
Entrer in scoulina es impustüt per Vos iffaunt, ma eir per Vus ün evenimaint important chi chaschuna grandas müdedas in Vos minchadi e chi po pisserer per fermas emoziuns. Vus confidais Vos iffaunt a la chüra d’üna mussedra . Vos iffaunt stu s’adüser ad ün nouv ambiaint e vi d’ üna nouva persuna da contact. Cò seguan ün pêr infurmaziuns in connex culla scoulina :

Las incumbenzas da la scoulina
In scoulina dess mincha iffaunt gnir accepto e sustgnieu in tuot sia persunalited. Üna da las premissas principelas per ragiundscher quist böt es üna buna collavuraziun traunter la mussedra, l’iffaunt e’ls genituors. Uschè chatta l’iffaunt ün ambiaint inua ch’el po giuver, fer scuviertas ed experimenter. El po fer bgeras experienzas, augmainta sieu savair  ed imprenda giuvand differentas abilliteds. Tres experienzas d’imprender fundamentelas vain l’iffaunt preparo per entrer illa scoula primara. Las incumbenzas principelas da la scoulina cumpiglian la promoziun da:

La cumpetenza sociela
Per bgers iffaunts es la scoulina il lö inua ch’els faun las prümas experienzas cun as mouver ed agir in  üna gruppa pü granda. Ils iffaunts imprendan da tadler, surpiglian respunsabilted, imprendan d’accepter ad oters, da güder e da’s lascher güder e cumainzan ad agir independentamaing.

La cumpetenza persunela
In üna atmosfera bainvugliainta e sgüra rinforza la mussedra als iffaunts d’esser avierts e critics invers l’egen cumportimaint e quel dals oters e da trer svessa decisiuns. Ils iffaunts imprendan a cugnuoscher lur ambiaint cun fer egnas experienzas.

La cumpetenza da la materia
La scoulina promouva il savair elementer, cun que cha la mussedra tratta temas chi pertuochan ed occupan l’iffaunt directamaing. Uschè imprenda l’iffaunt a s’occuper cun chosas dal minchadi.

Secturs da furmaziun

  • Umaun ed ambiaint
  • Lingua
  • Creativited e musica
  • Activiteds matematicas
  • Muvimaint e sport

Per respuonder ulteriuras dumandas sur da nossa scoulina staun las mussedras gugent a dispusiziun.