arcumander quista paginaemailFacebookTwitter

Chanter suot las fnestras

L’üsaunza da chanter our il liber düraunt il temp d’Advent, da Nadel o per la fin da l’an s’ho mantgnida fin hozindi. Il chaunt da Nadel a Schlarigna viva da las chanzuns da Gian Battista Fritschun.

Gian Battista Fritschun ho vivieu dal 1745 fin dal 1831. El es sto ravarenda a Schlarigna e faiva part dal movimaint pietist chi pretendaiva üna vita pü cristiauna dals crettaivels, faiva meditaziuns ed urazchuns eir in radunanzas privatas. Tenor Gion Gaudenz, chi s’ho occupo da la biografia da Fritschun, vaiva il ravarenda perfin abolieu il Chalandamarz, perque cha quist’üsaunza al paraiva memma pajana. Per la peja avaiva el introdüt il «chaunt suot las fnestras», e que davaunt mincha chesa.

"Chanter suot las fnestras" a Schlarigna
"Chanter suot las fnestras" a Schlarigna

Giuventüna mantegna las chanzuns

Auncha hoz chauntan a Schlarigna als 24 december a las 17.00 ils iffaunts da scoula tal bügl da Crasta ed a las 17.30 al Cuort Tschat var desch chanzuns. A partir da las 20.00 vaun ils creschieus e la giuventüna intuorn vschinauncha chantand in var desch lös chanzuns rumauntschas ed eir tudas-chas.

Autor: ANR