Revitalisaziun Inn

Scu bgeras otras ovas in Svizra es gnieu restret eir l’En a Schlarigna düraunt l’ultim tschientiner in sieu svilup natürel tres repars da las rivas. Zieva cha sun gnieus realisos grands progets da revitalisaziun a Samedan e Bever, es seguieu eir Schlarigna a quist exaimpel. Cul proget s’ho realiso imsüras, chi haun do inavous a l’En parts da sia liberted da svilup natürel. Lotiers s’ho stuvieu metter in consonanza culs augmaints da valur diversas cundiziuns da basa scu l’expansiun da l’aglomeraziun, bsögns da l’agricultura e turissem, scu eir la protecziun da l’ova da fuonz ed ovaziuns. Da que s’ho do la secreziun da zonas da protecziun e d’ütilisaziun. Las lavuors da revitalisaziun sun gnidas terminedas l’an 2025.

L’En in Engiadin’Ota do allogi a la populaziun da tschendratschs autoctona da la Svizra situeda il pü ot. Cha la populaziun as po mantegner autonomamaing tres reproducziun natürela sün quist’otezza sur mer, es remarchabel e la conceda importanza naziunela. Ün böt centrel dal proget d’eira perque la promoziun dals lös da viver natürels dals tschendratschs i’l En. Ultra da que profitan eir spezchas periclitedas d’otras gruppas da bes-chas scu eir plauntas reras da la revitalisaziun.

1. Il schlargiamaint dal spazi dal En tar Grevas vaiva in mira da promouver il svilup natürel da las agnas. Daspö il transferimaint dal ovel Schlatttain suot la vschinauncha i’ls ans 1940, mauncha in quist sectur l’integraziun da greva natürela. Tres que mauncha pel pü la forza motorica per ün svilup natürel da las agnas, perque cha sun gnidas s-chaffidas inizielmaing islas da gera scu elemaint important.

2. Ils lös da meger materiel ed alluviuns fuorman üna nischa ecologica chi dvainta adüna pü rera per numerusas sorts da plauntas e bes-chas tipicas per las agnas.

3. Il mür da crappa visibla onduleda lung la Vietta Grevas pissera per la sgürezza d’ovazuns per la vschinauncha Schlarigna.

4. Our da motivs da sgürezza cunter ovazuns vain la punt da passlung monteda mincha vouta d’utuon e demonteda aunz la malgeda in prümavaira. Ils pilasters per la punt restan tuot an aint ill’ova.


Tar Grevas dessan visitaduras e visitaduors pudair observer e vzair fich daspera il svilup da la cuntredgia dal flüm nouv s-chaffida.