Revitalisaziun Inn

Scu bgeras otras ovas in Svizra es gnieu restret eir l’En a Schlarigna düraunt l’ultim tschientiner in sieu svilup natürel tres repars da las rivas. Zieva cha sun gnieus realisos grands progets da revitalisaziun a Samedan e Bever, es seguieu eir Schlarigna a quist exaimpel. Cul proget s’ho realiso imsüras, chi haun do inavous a l’En parts da sia liberted da svilup natürel. Lotiers s’ho stuvieu metter in consonanza culs augmaints da valur diversas cundiziuns da basa scu l’expansiun da l’aglomeraziun, bsögns da l’agricultura e turissem, scu eir la protecziun da l’ova da fuonz ed ovaziuns. Da que s’ho do la secreziun da zonas da protecziun e d’ütilisaziun. Las lavuors da revitalisaziun sun gnidas terminedas l’an 2025.

L’En in Engiadin’Ota do allogi a la populaziun da tschendratschs autoctona da la Svizra situeda il pü ot. Cha la populaziun as po mantegner autonomamaing tres reproducziun natürela sün quist’otezza sur mer, es remarchabel e la conceda importanza naziunela. Ün böt centrel dal proget d’eira perque la promoziun dals lös da viver natürels dals tschendratschs i’l En. Ultra da que profitan eir spezchas periclitedas d’otras gruppas da bes-chas scu eir plauntas reras da la revitalisaziun.

1. Il Lej da Spuondas d’eira aunz la chanalisaziun ün meander da l’En. Tres la separaziun tres ün repar d’immez s’ho sviluppeda l’ova stagneda d’hozindi, chi serva scu zona da recreaziun locala per Schlarigna. Sper las sorts da peschs forella, tschendratsch e frilla vivan e cueschan cò eir andas sulvedgias ed andas moras.
Impü spordscha quista cuntredgia eir spazi da viver per la sort pericliteda merl d’ova. Structuras da laina morta spordschan refügis chi protegian ils peschs.

L’affluent tal Lej da Spuondas fuorma cun sieu cuors d’ova structuro e’l substrat da gera ün lö optimel per frajer peschs giuvens per tschendratschs e forellas d’ovel.

2. Per l’augmaint da valur ecologic dal let da l’En chanaliso s’ho eir realiso imsüras “Instream” ( sequenzas irreguleras da blocs da crappa). Tres que ho pudieu gnir diversificho il spazi da viver aquatic a favur da las sorts da peschs indigens forella e tschendratsch ed augmanto ecologicamaing.

3. Per la garanzia da la colliaziun per lung cul En es gnieu optimo il muvimaint dals peschs tal Lej da Spuondas culla reconstrucziun da la s-chela da peschs.