Abiter

Duos parts da vschinauncha: Schlarigna e Crasta

Schlarigna cun sieus var 1600 abitants s’exenta sur üna surfatscha da 2405 ha, da quellas sun 800 ha god. La vschinauncha cumpiglia duos parts dal lö, nempe Schlarigna e Crasta. A Crasta ho que chesas engiadinaisas venerablas, chi sun püs tschient ans veglias.

Cumprer e fitter

Il marcho d’immobiglias local vain marco tres il grand interess da Svizzers ed esters chi vöglian cumprer. Per l’acquist da terrain tres esters velan prescripziuns specielas in Svizra: sainza permiss da domicil stu uschè üna cumpra per regla gnir acconsentida da las instanzas.

Passa 70% dals Svizzers vivan in abitaziuns fittedas. Perque sun las cundiziuns per üna fittaunza e la protecziun dals fittadins fich bunas. La chadafö e’l bain tuochan tal equipamaint da basa. Las abitaziuns vegnan fittedas cun u sainza mobiglia per tuot an u be per üna stagiun. In mincha chesa da fit staun a disposiziun üna maschina da laver, üna süjantera (tumbler) u ün local da süjanter. Intaunt cha vegnan fats tar abitaziuns contrats da fittaunza cun ün temp da desditta da trais mais, vegnan fittedas chesas cun contrats da püs ans.

La vschinauncha Schlarigna do a fit abitaziuns in diversas chesas. Las publicaziuns correspundentas as po ler a la tevla naira u ill’Engadiner Post/Posta Ladina.

Sün basa da la granda retschercha, impustüt per fittaunzas da stagiun, vain arcumando da tschercher uschè bod scu pussibel ün’abitaziun a Schlarigna. Bgers ineteressos per üna fittaunza tcherchan eir illas vschinaunchas chantunaisas San Murezzan, Puntraschigna, Samedan, Silvaplauna e Zuoz.

 

 

Contuorns

La vschinauncha dasper San Murezzan nun es brichafat situeda illa sumbriva da quella, ma davent dal travasch – e glistess fich daspera a las activiteds illa destinaziun da vacanzas Engiadina San Murezzan. Zieva il temp da glatsch s’ho aviert i’l chantun Grischun dad hoz sün 1800 m.s.m. üna val alpina dad 80 kilometers lungezza – l’Engiadina, chi tuocha tar las vals abitedas situedas il pü ot da l’Europa. Düraunt bgers tschientiners d’eira la val ragiundschibla be sur ils pass e la marchanzia gniva transpurteda sün sendas da soma strettas cun müls e chavals. Daspö la renovaziun da las vias dals pass, la fabrica da la Viafier retica e dal Bernina Express, chi maina fin in Vuclina, es l’Engiadin’Ota accesibla per tuot il muond.

“La chüna da tuot ils tuns argients...”

Sper il vadret il pü imposant  da las Alps orientelas, il Morteratsch, e l’unica muntagna sur 4000 meters, il Piz Bernina, as rechatta cò la funtauna da l’En, chi dess avair do sieu nom a la val. Perche cha in rumauntsch significha la fuorma uriunda dal pled Engiadina «üert da l’En». Ün üert, chi vela scu tresor botanic al pè dal massiv dal Bernina cun sieus numerusas muntagnas sur 3000 meters e dasper il Parc Naziunel Svizzer, cun sieus gods natürels da larschs e dschembers. La val ho in media 322 dis da sulagl l’an.

Il gö da la glüsch fascinant ho fat crajer a Nietsche d’avair chatto la chüna da tuot ils tuns argients («Wiege aller Silbertöne»)...

Visitaduors da tuot il muond, ubain sportist u gourmet, giodeder u filosof haun minch’an ün böt – l’Engiadina. Saja que la spüerta richa d’activiteds da sport e temp liber, spezialiteds our da la chadafö indigena, la cultura ed architectura singulera, numerusas occurrenzas scu eir il Lifesyle pulsant a San Murezzan d’üna vart, e la quietezza e recreaziun da l’otra vart. L’Engiadina es incumparabla in sia varieted, unica illas Alps e perque premieda bgeras voutas.

Cò do que tuot las infurmaziuns davart la regiun da vacanzas Engadin St. Moritz.

regiuns cunfinantas:
Engadin Scuol 
Val Poschiavo 
Bergell 

 

Sgürezza & nettaschia

Sgürezza

Schlarigna ho, scu l’intera Svizra, üna quota da criminalited da las pü bassas insomma. La polizia es integreda fich bain e daspera a la populaziun. Que permetta ün bun barat persunel ed argumantescha il sentimaint da granda sgürezza illa cumünaunza.

 

Nettaschia

Sadellas da s-chart, lös da ramassamaint da vaider e metal sun scumpartieus in tuot la vschinauncha. Pel s-chart da chesa vegnan druvos sachs d’immundizchas speciels. I’l predsch da quels es fingià integreda la taxa d’alluntanamaint. Ils sachs d’immundizchas cotschens dal ABVO as po cumprer in tuot las butias da mangiativas e paun gnir depositos illas chesinas d’immundizchas. Duos voutas l’eivna vegnan alluntanedas las immundizchas.

.

A+
A-