Sandet

Qualited da vita ota, granda spüerta pella sandet

Schlarigna spordscha düraunt tuot an üna qualited da vita ota, cun uras da sulagl surproporziunedas ed üna vista sainza tschiera sül muond alpin magnific. Ün muond, i’l quêl cha pitschens e grands miraculs da la natüra fuorman üna culissa excellenta per sport, cultura, activited e quietezza. Il sectur sandet garantescha in Engiadia’Ota ün provedimaint medicinic fich bun. La spüerta d’ospidels, dmuras d’attempos e fliamaint, meidis cun egnas pratschas ed apotecas fich bunas accumpleschan quasi mincha giavüsch.

 

Ospidel Engiadin’Ota, Samedan

L’Ospidel circuitel per tuot l’Engiadin’Ota as rechatta a Samedan e spordscha il provedimaint da basa schlargio. El es eir respunsabel per incumbenzas surdedas dal Chantun pellas regiuns Engiadina Bassa, Val Müstair, Puschlev e Bergiaglia. L’Ospidel Engiadin’Ota pissera pel provedimaint acut staziunar da la populaziun scu eir il trattamaint staziunar dals paziaints da la chirurgia. L’ospidel spordscha eir prestaziuns in ginecologia ed assistenza al part. Impü vegnan spüertas funcziuns specialisedas per oters ospidels (impustüt per la radiologia).

Clinica Gut, San Murezzan

San Murezzan dispuona culla Klinik Gut d’üna clinica privata. La clinica ho indrizs per steriliser ils pü moderns ed üna tecnica da nettaschia dals locals fich sensibla. Tuots duos sun premissas decisivas per cundiziuns d’operaziuns sterilas. La clinica topmoderna cun duos selas d’operaziun, egen MRI e Heli-Port ho cun tuot sieus indrizs moderns ün scharm familier, il quêl predschan paziaints da la Svizra e da l’extern.

 

Spitex Engiadin’Ota

Grazcha a las prestaziuns da la Spitex paun pertuchos rester a chesa in lur ambiaint üsito melgrô restricziuns persunelas causedas tres malatia, accidaint, impedimaint, mendas da l’eted, maternited u sumgiaint u chi tuornan pü bod a chesa d’üna dmura staziunara. Il böt da la Spitex Engiadin’Ota es da mantegner e promouver l’autonomia dal cliaint. Perque prouvan ils collavuratuors da la Spitex d’integrer scha pussibel l’ambiaint familier dals pertuchos illa chüra e l’agüd.

 

Dmura pels attempos Promulins, Samedan

La dmura pels attempos Promulins es ün’instituziun da dret public per persunas pü veglias u chi bsögnan chüra da l’Engiadin’Ota e contuorns. Promulins s’inclegia scu lö d’inscunter e spordscha scu instituziun avierta contacts traunter dmura e societed.

.

A+
A-