Üsaunzas

Üsaunzas

Chanter suot las fnestras

Quist’üsaunzas cul chaunt da Nadêl e per la fin da l’an our il liber, s’ho mantgnida fin hoz. Il chaunt a Schlarigna viva da las chanzuns da Gian Battista Fritschun.

Gian Battista Fritschun ho vivieu dal 1745 fin al 1831. El d’eira ravarenda a Schlarigna e scu pietist s’ho'l ingascho per ün möd da viver cristiaun dals crettaivels. Eir i’l ravuogl pivat ho’l offrieu meditaziuns ed uras d’urer. Tenor Gion Gaudenz, chi s’ho apprufundieu intensivmaing culla biografia da Fritschun, avaiva il ravarenda perfin scumando il Chalandamarz, perche cha quell’üsaunza al peraiva memma pajauna. A la plazza dal Chalandamarz avaiva’l introdüt il „chanter suot las fnestras“. Quella vouta gniva chanto suot mincha fnestra.
 

Chaunt vain mantgnieu eir da la giuventüna

Aunch’hoz chauntan ils iffaunts als 24 december a las 17.00 tal Bügl da Crasta ed a las 17.30 tar la Cuort Tschat var 10 chanzuns. Davent da las 20.00 as radunan commembers da la giuventüna ed eir persunas creschidas e vaun da lö a lö tres vschinauncha a chanter las chanzuns rumauntschas e tudas-chas.

 

Chalandamarz

Üna veglia üsaunza engiadinaisa

Las rischs da l’üsaunza dal „Chalandamarz“ as chatta i’l temp pajaun, tals Romauns. Il mais marz es dedicho al Mars, il Segner dal sulagl e da la guerra. Tenor il chalender giuliaun cumanzaiva l’an in marz ed illas regiuns pü chodas cumanzaiva cò eir la prümavaira. Quist evenimaint gniva festagio per ruver al Segner Mars la benedicziun per champs, pros e bes-chas. Ils Romauns haun giuvo üna rolla importanta eir in Engiadina ed haun lascho inavous stizis da lur üsaunzas.

Tar quist üsaunza as schloppa hozindi las giaischlas e’s s-chatscha in s-chelland e chantand ils spierts invisibels. La canera dess fer temma al spiert da l’inviern e sdasder la früttaivlezza da la prümavaira. Que nu d’eira adüna uschè: Scu già manzuno es l’üsaunza a Schlarigna gnida scumandeda intuorn il 1750 dal ravarenda Gian Battista Fritschun. Zieva ün’interrupziun da bod duos tschientiners es l’üsaunza a Schlarigna darcho gnida activeda la prüma vouta l’an 1968. Daspö lo es que l’üsaunza prediletta dals iffaunts.

Merkblatt Chalandamarz 
Foglio d’avviso 

Marenda maruns

Üna vegl’üsaunza cun derivaunza intscherta

L’organisaziun da quist’üsanza surpiglia adüna l’ultima classa dal s-chelin ot. Las scolaras e’ls scolars da tuot la scoula as chattan a las 13.00 sün plazza da scoula. Alura vaune cumünaivelmaing tal Lejin da Bernina (Staziun Staz), inua cha’ls grands brassan ils maruns sül fö aviert. Travestieus scu sudos, cuschinunzs, duonnas veglias, strias e.u.i faune alura ün cortegi tres vschinauncha e scumpartan maruns chods als aspectatuors. Il cortegi glivra sün plazza da scoula, inua cha vegnan rangos ils trais iffaunts culs pü bels custüms. Marenda maruns vain organiseda tenor ora cuort aunz u zieva las vacanzas d’utuon. Ils iffaunts as paun parteciper a l’üsaunza facultativmaing.

 

 

A+
A-