Economia

Turissem scu motor

Schlarigna es situo güsta daspera a San Murezzan ed es ün lö da vacanzas sviluppo fich bain sün s-chars 1800 meters sur mer. Las cumpetenzas-clev dal lö sun colliedas ferm cul turissem e dependentas da quel. La vschinauncha Schlarigna dispuona d’ün’administraziun efficiainta, amiaivla pels cliaints ed orienteda pels servezzans. Insembel culs commembers da las instanzas politicas sto in prüma lingia la collavuraziun da partenari cull’economia ed otras gruppas d’interess.

Fundaziun d’üna firma tuot simpel

Tar üna fundaziun d’üna firma u ün domicil da l’intrapraisa spordscha la vschinauncha agüd nabürocratic. Ella güda tar formaliteds e procurescha contacts importants tar autoriteds e partenaris. Ulteriuras infurmaziuns as survain tar EasyGov.swiss  – il fnestrigl online per intrapraisas.

Commerzi e misteraunza

La societed da commerzi e misteraunza Schlarigna es gnida fundeda l’an 1981 ed ho hoz var 70 commembers. In quista pitschna societed regna üna relaziun d’amicizcha traunter ils commembers. Occurrenzas chi‘d haun lö regulermaing rinforza quistas relaziuns. Que sun traunter oter la festa sün via da Schlarigna, sairedas tematicas, occurrenzas cun gianter, tavulin da la societed ed oter pü.

La societed ho scu böt la chüra e promoziun taunt dals interess professiunels da sieus commembers scu eir ils interess cumünaivels da la situaziun da commerzi e misteraunza. Las activiteds da la societed s’orienteschan impustüt sur da:

  • Sustegn da tuot las intenziuns chi servan ad ün svilup economic saun da la vschinauncha
  • Piglier posiziun a dumandas d’economia ed otras chi pertuochan la vschinauncha u ils interess cumünaivels dals commembers da la societed
  • Cumbat cunter la concurrenza illojela in tuottas manieras
  • Sclarimaint dals commembers davart dumandas economicas e da commerzi importantas
  • Mantegnimaint e promoziun dals interess professiunels da las sorts da misters chi faun part da la societed
  • Promoziun dals egens sforzs commerciels
  • Promoziun da la scolaziun da giarsuns e furmaziun professiunela

 

Contact

Reto Weisstanner, president
Plazza da la Staziun 3
CH-7505 Schlarigna
T +41 81 832 13 48
info@hgv-celerina.ch
www.hgv-celerina.ch

La gastronomia

Ledscha da gastronomia pissera per cundiziuns da basa
Schlarigna posseda üna ledscha da gastronomia chi regla la lavur gastronomica  e’l commerzi da detagl dals vinars sün territori da la vschinauncha Schlarigna. Las prescripziuns infurmeschan davart permiss, uras d’avertüra scu eir taxas per lavuors gastronomicas illa vschinauncha. La ledscha ho eir scu böt la protecziun da giuvenils cunter l’abüs d’alcohol ed es ün’agiunta da la ledscha da gastronomia chantunela.

 

Dumandas

La gestiun d’ün’ustaria pretenda ün permiss. La dumanda es d’inoltrer a la suprastanza cumünela da Schlarigna culla documainta seguainta:

  • Extrat dal register penel
  • Cumprouva cha nun es gnieu cuntrafat repetidamaing u in maniera greiva cunter la legislaziun da vivandas federela u chantunela düraunt ils ultims tschinch ans
  • Conferma in scrit cha’s ho piglio cogniziun da las prescripziuns da la ledscha da gastronomia chantunela Art. 5 alinea 4

Dumandas per ün permiss d’ustaria limito u d’ustaria da festa illa vschinauncha da Schlarigna sun d’inoltrer a l’Administraziun cumünela Schlarigna.

 

Impostas

Schlarigna es üna da las vschinaunchas cun impostas las pü favuraivlas dal chantun Grischun. Il pè d’impostas da la vschinauncha per persunas natürelas importaiva l’an 2018 50 % da l’imposta simpla dal Chantun. La calculaziun da las impostas as basa sün tariffas concepidas in möd progressiv taunt pellas impostas d’entredgia scu eir pellas impostas sülla faculted. 

A+
A-