Revitalisaziun En

Üna schanza per Schlarigna

A la prüma plazza d’üna revitalisaziun da l’En a Schlarigna sto l’augmaint da valur da las relaziuns ecologicas aint e lung las ovas e l’amegldramaint da la reticulaziun a traviers tres la fuormaziun da rivas richas da structuras cun üna vegetaziun da rivas confuormas al lö. Il stedi ecomorfolog da l’En vain amegldro culla revitalisaziun planiseda e numerus habitats nouvs e spüertas da lös da frejas per la lichiva d’ovel e tschendratschs vegnan s-chaffieus scu eir spazis da viver adattos per flora terrestra e fauna. La situaziun per la sgürezza d’ovas grandas da Schlarigna vain amegldreda e’l ris-ch da ruottadüras da mürs ed erosiun da las varts vain diminuieu.

L’intenziun da revitalisaziun augmainta ultra da que la valur da la cuntredgia dal flüm. La regulaziun dals visitaduors planiseda pussibiltescha ün access tar parts da las ovas u permetta invistas attractivas i’ls sectuors d’ovas revitalisedas. L’attractivited our d’vista da la recreaziun locala e dal turissem vain augmanteda ferm.

La revitalisaziun da l’En da la vschinauncha Schlarigna progetteda maina da la fin da la chavorgia Charnadüra fin tal cunfin da la vschinauncha cun Samedan, tar la Punt dals Bovs, cun üna lungezza da ca. 2,5 km.

Finanziaziun

Tenor il dret da finanzas sun revitalisaziuns incumbenzas cumünaivlas traunter Confederaziun, chantuns e vschinaunchas. La vschinauncha Schlarigna, scu patruna da fabrica vain tres que sustgnida considerabelmaing da la Confederaziun e dal chantun Grischun. Ils cuosts totels per la revitalisaziun da l’En muntan a 4,8 milliuns francs. La cofinanziaziun dumandeda tres il fonds naturemade star da ewz ill’otezza da 500’000 francs es gnieu acconsentieu dal gremi da direcziun Öco-Fonds. La scumpartiziun dals cuosts definitiva traunter Confederaziun, Chantun e vschinauncha vain fixeda cul acconsentimaint dal proget tres il Chantun. La partecipaziun als cuosts da la vschinauncha Schlarigna muntan a max. 20% (=960’000 francs).

Cumanzamaint da fabrica e düreda

Cun l’appruvaziun dal credit da la radunanza cumünela scu eir cun l’apppruvaziun dal proget tres la Regenza dal chantun Grischun es planiso il cumanzamaint da fabrica la sted 2022. Tenor program da fabrica esa previs da gliver las lavuors l’inviern 2024.

Actas d’exposiziun

A+
A-