Scoulina

Scoulina

Il cumainzamaint da la scoulina es per ün iffaunt, ma eir pels genituors, ün evinimaint important, chi porta cun se eir ün grand müdamaint i’l minchadi. Ils genituors surdaun la chüra da lur iffaunt ad üna mussedra e l’iffaunt as stu abiner cun üna nouva persuna da contact in ün nouv ambiaint. Perque seguan cò ün pêr infurmaziuns.
 

Las lezchas da la scoulina

In scoulina dess minch’ iffaunt gnir sustgnieu ed accepto in sieu svilup persunel. Perque es üna collavuraziun traunter mussedra,  iffaunt e genituors ün importanta premissa. Cò chatta l’iffaunt ün ambiaint inua ch’el po giuver, scuvrir ed experimenter. El po ramasser egnas experienzas, schlargia sieu savair ed imprenda tar differentas activiteds bgeras abilteds. A maun dad experienzas d’imprender vain l’iffaunt preparo pel müdamaint in scoula.

Cumpetenza sociela

Üna da las pü importantas funcziuns da la scoulina es da promouver la cumpetenza sociela da minch’iffaunt. Per bgers iffaunts es la scoulina il lö, inua cha vegnan confruntos la prüma vouta cun üna gruppa pü granda e paun fer lo lur experienzas e’s sviluper inavaunt. Els imprendan a tadler tiers,  surpiglian respunsabilted ed  imprendan ad accepter ad oters. Els imprendan eir da güder ed accepter agüd e cumainzan ad agir independentamaing.
 

Cumpetenza individuela

In ün’ atmosfera da bainvuglientscha e premura rinforza la scoulina ils iffaunts d’inscuntrer aviertamaing e criticamaing l’egen cumportimaint e quel dad oters e trer decisiuns. Ils iffaunts imprendan a cugnuoscher e scuvrir independentamaing lur ambiaint.
 

Differentas cumpetenzas

La scoulina promouva il savair elementer, tres temas tschernieus da la persuna d’instrucziun chi pertuochan ed occuppan directamaing a l’iffaunt. L’iffaunt imprenda ad ir intuorn cun chosas ch’el inscuntra illa vita dal minchadi.
 

Champs da furmaziun

Cha l’iffaunt po gnir promovieu in sieu svilup vegnan instruieus ils iffaunts i’ls seguaints champs da scoulaziun:

  • Umaun ed ambiaint
  • Lingua
  • Disegner,  zambrager ed instrucziun musicala
  • Agir matematic
  • Muvimaint e sport

Per ulteriuras dumandas staun nossas persunas d’instrucziun gugent a disposiziun.
 

A+
A-