Schlarigna

Purtret

Immez quista valleda alpina unica es situeda la vschinauncha ourdvart sulagliva Schlarigna. Ils giasts vaun spassegiand tres ils minzs da las duos parts Schlarigna e Crasta cun lur chesas engiadinaisas tipicas. La sted invida üna rait extaisa da vias per chaminer e da mountainbikes scu eir il Lej da Staz vicin da giodair la natüra engiadinaisa in ün möd fich bel. D’inviern sun las pendiculeras chi mainan illa regiun da skis Corviglia-Marguns cun renom mundiel, be ün pêr pas davent dal minz da la vschinauncha. E grazcha a la posiziun centrela illa regiun da vacanzas Engiadina San Murezzan es collio Schlarigna fich bain culs mezs da trafic publics.

Schlarigna e San Murezzan

La vschinauncha dasper San Murezzan nun es brichafat situeda illa sumbriva da quella, ma davent dal travasch – e glistess fich daspera a las activiteds. Uschè nu parta Schlarigna cun San Murezzan be la regiun da skis, dimpersè eir il Olympia Bob-Run San Murezzan-Schlarigna renumno ed il Cresta Run ( la pista da Skeleton). Il böt da las duos pistas da glatsch, chi partan a San Murezzan, es daspö 100 ans Schlarigna..

Sport, cultura e temp liber

In vicinanza, sü Muottas Muragl, vegn promovieu il schlisuler e spassegiedas d’inviern. Ils amatuors da passlung scuvreschan davent da Schlarigna la vasta rait da passlung da l’Engiadin’Ota intaunt cha fans dal sport sün glatsch vaun culs pattins o giouvan a curling sülla plazza da glatsch la pü sulagliva da l’Europa i’l Center da Sport.

Pel giodimaint culturel pissera ün grand numer d’occurenzas d’ota qualited. In restorants paschaivels vegnan servidas bunteds indigenas in ün ambiaint autentic.

 

Cun perspectivas i’l avegnir

Cun üna concurrenza da progets ho la vschinauncha l’intenziun da ramasser idejas per üna furmaziun da la vschinauncha pü attractiva. Tres que dess l’attractivited gnir augmanteda per giasts, indigens scu eir hotels e butias.

Divers ulteriurs progets scu la realsiaziun dal conzept da trafic e parkegis u la renatüralisaziun da l’En e divers affluents dessan contribuir ad ün Schlarigna vitel.

Touristisches Leitbild

Fats e datas

Celerina/Schlarigna

  • Situo i’l minz da la regiun da vacazas Engiadina San Murezzan
  • Appartegna a la Regiun Malögia
  • Meters sur mer: 1’730 meters
  • Vschinauncha bilingua: Rumauntsch (puter) e tudas-ch
  • Passa 320 dis da sulagl per an
  • Scharm originel cun chesas engiadinaisas tipicas
  • Simbol: Baselgia San Gian dal 14evel tschientiner
  • ca. 1’600 abitants, ca. 400 famiglias
  • Böt dal Olympia Bob-Run San Murezzan-Schlarigna renumno in tuot il muond
  • Böt dal Cresta Run (pista da skeleton)
  • Surfatscha: 2405 ha, da que 800 ha god
  • Il turissem es la branscha la pü importanta
  • Fich bunas colliaziuns da trafic cun tren, auto ed aviun

Abiter & lavurer

  • Marcho d’immobiglias attractiv
  • Granda retschercha sül marcho d’abitaziuns
  • Rata da criminalited fich bassa
  • Plazzas da lavur per granda part i’l turissem
  • Impostas bassas
  • Politica attractiva per famiglias
  • Trafic public fabricho our plainamaing
  • Provedimaint medicinic fich bun in stretta vicinanza (Ospidel Engiadin’Ota)
  • Üna spüerta enorma da pussibilteds pel temp liber e pel sport d’inviern e da sted
  • Chalender d’occurenzas fich grand, numerus restorants ed hotels
  • Vita da societeds intacta
  • Vschinauncha da confessiuns masdedas (evangelic-refurmo e catolic-romaun)
  • Fich bunas pussibilteds per ir a fer cumpras in stretta vicinanza

Istorgia

La vschinauncha Celerina/Schlarigna ho ün nom dobel. I’l decuors da l’istorgia es dvanto üsit quist nom our da möds da scriver divers. L’an 1949 es gnieu introdüt il nom in quist stil. Celerina/Schlarigna vain numno in scrit per la prüma vouta i’ls uschedits “contrats da Gamertinger”. Cun quists contrats ho confermo l’uvas-ch da Cuira la cumpra da divers bains in Engiadin’Ota dals cunts da Gamertingen.

 

Da la vschinauncha da paurs al lö da vacanzas

Fin la mited dal 19evel secul d’eira Schlarigna üna vschinauncha da paurs. Que s’ho müdo cul svilup dal turissem in Engiadin’Ota. Hoz es Schlarigna ün lö da vacanzas cuntschaint cun üna regiun da skis granda (insembel cun San Murezzan), il god da Staz e’l Lej da Staz scu zona da recreaziun locala scu eir il Olympia Bob-Run San Murezzan-Schlarigna da renom mundiel e la pista da skeletons Cresta Run chi mainan tuots duos da San Murezzan a Schlarigna.

 

Baslegia San Gian scu simbol

La baselgia San Gian (refurmeda) es il simbol da Schlarigna. Ella fascinescha cun frescos ed ün palintschieu sur da lain pittüro a maun. La baselgia, chi deriva dal 14evel secul, es üna da tschinch baselgias da Schlarigna ed es ün monumaint d’importanza naziunela.

Ad es speciel ch’ella cun sieu pitschen clucher romaun e’l grand clucher gotic es gnida fabricheda süllas restanzas d’üna baselgia da pü bod. L’an 1682 ho üna sajeta chalo il clucher grand e la chaplina a piz da quel es ida sü in flammas, la quela nun es mê pü gnida reconstruida. Uschè sto la baselgia aunch’hoz sün ün döss da spelm ün po dadour la vschinauncha.

La vappa da la vschinauncha

Mellan, cotschen ed alv scu culuors da la vschinauncha

La vappa da Schlarigna consista da seguaints elemaints: las culuors or e cotschen, ün muglin cotschen ed ün vout da murütsch ruegen-argient cun duos archs e duos püttas. Il vout muossa vi sül nom da la vschinauncha, il muglin sülla cultivaziun da granezza ed  arvaglia istorica in Engiadin’Ota. Las culuors as refereschan süls ornamaints da vappas da la baselgia San Gian. La vappa odierna deriva dal 1980 e daspö lo sun las culuors uficielas da la vschinauncha mellan, cotschen ed alv.

 

Ils elemaints in detagl

Il vout da murütsch as referescha süls deposits da provisiuns dal uvas-ch da Cuira, chi existivan i’l temp d’immez. Cul muglin vegnan trats adimmaint ils muglins da la vschinauncha chi nun existan hoz pü. Las culuors as refereschan süls ornamaints da vappas da la baselgia San Gian. Cull’introducziun da la vappa nouva es gnieu abolieu l’emblem vegl, chi mussaiva la baselgia San Gian tuot in nair sün fuonz alv.

A+
A-