Cultura e lingua

Friedrich Nietzsche, Hermann Hesse, Thomas Mann, Rainer Maria Rilke, Ferdinand Hodler, Richard Wagner, Giovanni Segantini. Che chi tuna scu ün Who is who da scriptuors, filosofs ed artists renumnos da temps passos, es eir la glista da noms da viandants chi haun gieu gugent l’Engiadina. Tuots haun tschercho e chatto cò recreaziun e guarischun, distracziun, impuls culturels e sfidas sportivas ed alpinas.

L’Engiadina es hoz l’epizentrum culturel dal Grischun. Grazcha a la lingua rumaun-tscha, la vicinanza tar l’Italia e la populaziun dal lö chi discuorra impustüt tudas-ch, vegnan insembel cò trais culturas. Gallarias pitschnas, ma excellentas e museums muossan ouvras preciusas da l’intern ed extern. Orchesters da stüva, bains culturels mundiels da l’UNESCO, üsaunzas tradiziunelas scu la Schlitteda ed il Chalandamarz scu eir occurrenzas d’art d’ota qualited haun furmo la reputaziun engiadinaisa scu val da la cultura.

Rumauntsch – la quarta lingua naziunela da la Svizra

Var 65 % dals ca.190’000 abitants dal Grischun declareschan tudas-ch scu lingua materna, 17 % retorumauntsch, 11 % taliaun e s-chars 7 % otras linguas. Il retoru-mauntsch nun es üna lingua, dimpersè üna famiglia da – tuot tenor definiziun – tschinch fin set idioms. A Schlarigna vain discurrieu rumauntsch (puter) e tudas-ch, eir la scoula es bilingua.