Infurmaziuns generelas

La scoula da Schlarigna as cumpuona our da la scoulina, (duos annedas) e la scoula primara (1. fin 6. classa). In ün’infrastructura moderna ed adatteda al temp spordschains nus fich bunas cundiziuns per l’imprender. Üna classa cumpiglia traunter 10 e 20 scolaras e scolars. La magistraglia as cumpuona dad üna mussedra, duos accumpagnedras da lingua, ses magisters, üna magistra per lavur textila, trais pedagogas curativas ed üna magistra d’assimilaziun. Nossa scoula es bilingua daspö l’avuost 2016. Que voul dir cha’ls iffaunts imprendan già a scoulina duos linguas, il rumauntsch (idiom putèr) e’l tudas-ch da scrittüra.

La scoulina

La scoulina vain mneda in maniera dad annedas masdedas. La persuna d’instrucziun vain accumpagneda da duos accumpagnedras da lingua (rumauntsch/tudas-ch da scrittüra) e d’üna pedagoga curativa.

La scoula primara

Düraunt il temp cha’ls iffaunts vaun in scoula primara, vegnan els instruieus traunter 65 fin 75 % per rumauntsch e traunter 25 fin 35 %  per tudas-ch da scrittüra. Davent da la 2. classa fin illa 6. classa haun ils iffaunts üna lecziun zambrager textil per eivna. Quistas lecziuns vegnan instruidas d’üna magistra specialiseda.

Il s-chelin ot

Illa scoula superiura vaun las scolaras e’ls  scolars illa vschinauncha chantunaisa a Samedan, inua ch’els vegnan transpurtos culs mezs publics. In vicinanza da Schlarigna ho que trais scoulas medias privatas: l’Academia Engiadina a Samedan, il Lyceum Alpinum a Zuoz e l’Institut Otalpin a Ftan.
 

„Mincha cudesch es ün s-chazi. Tü stust be chatter la clev per il pudair avrir.“

Illa biblioteca da scoula as chatta cudeschs da purtrets, parevlas, cudeschs d’aventüras, crimis, ma eir infurmaziuns sur da la natüra e nos ambiaint. Que ho cudeschs per iffaunts da scoulina e per quels da la scoula primara. Üna vouta l’eivna as po ir in biblioteca düraunt l’ura d’avertüra a tschercher ün cudesch adatto ed alura impraster quel per ün mais.

Temps d’avertüra

Gövgia da las 15.35 – 17.15

Il program da success  da la scoula muvanteda vain realiso in passa 70 scoulas i’l chantun Grischun. Iffaunts e giuvenils sun inchantos dals differents möds da’s muvanter i’l minchadi da scoula. La scoula da Schlarigna quinta eir sül sustegn dals genituors. Que es fich important, perche cha la famiglia giouva üna rolla centrela areguard  la sandet dals iffaunts.

Reglas da la scoula primara da Schlarigna

• In scoula s’ho que da’s cuntgnair quiet, intaunt ch’oters haun scoula.
• In scoula as po entrer pür cur cha que sclingia.
• Düraunt la posa granda stöglian tuot ils iffaunts banduner la chesa da scoula.
• Illa guarderoba es da tgnair uorden.
• Telefonins sun scumandos e vegnan confiscos.
• Velos, trottinets ed assas cun roudas as po druver pür davent da la 2. classa e que be pel viedi in scoula.
• Düraunt il temp d’instrucziun (07.40 – 12.00 / 14.00 – 16.35) nu’s po druver ils velos, trottinets e las differentas assas cun roudas sülla plazza da scoula.
• Ballottas as po bütter be sülla plazza da sport.
• Blastemmer, spüder ed ün cumportimaint negativ vegnan chastios.
• Düraunt la posa nu’s po banduner la plazza da scoula.
   

Sen e scoppo da las lezchas

Las lezchas sun ün agiunta da l’instrucziun. Ellas servan a l’aprofundir, consolider e la preparaziun da la materia. Las scolaras e’ls scolars dessan imprender a lavurer independentamaing e da partir aint lur temp efficiaintamaing. In fand lezchas culs iffaunts survegnan ils genituors ün’ideja da la materia instruida in scoula ed els vezzan uschè eir il cumportimaint da lavur e las prestaziuns da l’egen iffaunt.
 

Pratcha da lezchas

D’avantag per scolaras e scolars sun pitschnas purziuns da lezchas scumpartidas regulermaing. Qualited aunz quantited! Bun es, scha las lezchas promouvan il penser dals iffaunts e’l preparan sün l’instrucziun. Que paun eir esser exercizis chi’s repetan per aprofundir uschè la materia da scoula. Las lezchas vegnan conrolledas da la persuna d’instrucziun e tenor bsögn discusas culla scolara u’l scolar. La quantited e’l möd da lezchas vain adatteda a l’eted e’l savair da las scolaras e’ls scolars. Düraunt las uras a l’ur dal temp da bloc haun ils iffaunts la pussibilted da fer las lezchas in scoula. Scha las lezchas nu paun üna vouta gnir fattas, vain que communicho i’l cudeschin da lezchas (suottascripziun).
 

Cussagls per genituors

• Ch’Els decidan insembel cun lur iffaunt cur cha las lezchas vegnan fattas düraunt il di.
• Las lezchas haun priorited aunz otras activiteds (hobi, computer, telefonin, televisiun e.u.i.)
• Il lö da lavur dess esser iglümino bain ed esser quiet (üngüna televisiun, radio, telefonin ed üngüns oters iffaunts i’l listess local).
• L’iffaunt dess scha pussibel schoglier svess las lezchas.
• Tar problems chi’s repetan adüna darcho pervi da las lezchas dess gnir tschercho il discuors cun la persuna d’instrucziun.
• Ch’Els muossan interess vi da la scoula e las lezchas e ch’Els lodan a lur iffaunt pels sforzs ch’el fo.