Temp liber e sport

Cò as po viver bain ...

La regiun Engiadina San Murezzan as preschainta cun üna spüerta immensa da pussibilteds da sport e temp liber taunt d’inviern scu eir da sted. Quista situaziun da partenza nüzzagian ils indigens ma eir ils giasts numerus. Cun quatter pizs principels, 350 kilometers pistas cun garanzia da naiv, 150 kilometers sendas e 190 kilometers loipas vela l’Engiadina scu üna da las pü grandas regiuns da sport d’inviern da la Svizra. Eir da sted es l’Engiadina ün paradies per glieud activa: chaminer, rampcher, ir a sella, pas-cher, ir culla barcha a vela, ir cun l’assa da surf, golf ed ir cul velo.

... ed eir manger ...

La guida turistica GaultMillau muossa cha giasts in Engiadina nu mangian be bain düraunt il Festival da gurmet San Murezzan. Ils bgers puncts da GaultMillau illa val significha «Haute Cuisine» i’l vair segn dal pled sül tet dal muond perche cha püs dals restorants da prüma qualited engiadinais as rechattan sur 1800 m.s.m. La spüerta es richa da scenarias e specialiteds. Las cartas da menüs cuntegnan chadafö da gurmet, specialiteds squisitas da l’Italia, bunteds regiunelas scu Capuns e’ls classikers fondü e raclette. A tuot las uras dal di as survain ultra da que eir paunins e dutscharias i’ls numerus cafès, bars e lounges. Dal rest vela que eir da pruver üna vouta la Tuorta da nusch engiadinaisa. Ils pastiziers indigens haun perfecziuno quista specialited, cumbino cun caramella, gramma e nuschs. Uschè nun es be naschida la specialited engiadinaisa renumneda «Tuorta da nusch engiadinaisa» dimpersè tradiziun cuntschainta sün tuot il muond.

... ed ir in sortida.

Bars classicas cuntschaintas, bars, lounges e clubs nouvs cun carisma internaziunel do que bgers düraunt las nots illa stagiun ota. Sper bars da cult e terassas da sulagl vi pel di sün e dasper las pistas, as chattan bgers indigens e giasts vers saira per ün Après-Ski-Drink in vschinauncha. Il Casino San Murezzan, situo sper l’hotel Kempinski spordscha divertimaint in ün ambiaint nöbel e que na be per glieud chi tschercha la furtüna tal gö.

E scha que nun es auncha avuonda ...

Grazcha a la natüra chi fo adüna darcho ster stut a giasts ed indigens, ün chalender d’occurrenzas vario ed ün program da cultlura unic nu do que üngüna lungurella in Engiadin’Ota. Sch’Els vessan tuottüna üna vouta vöglia da fer ün’excursiun schi’s po fer viedis d’ün di. Per exaimpel a Puschlev sülla Piazza a manger ün «gelato», giò’n Bergiaglia i’l cumün muntagnard Soglio, üna visita illa Clostra San Jon a Müstair u i’l Park Naziunel Svizzer a Zernez, ün viedi in Engiadaina Bassa u in Italia na dalöntsch davent.

Glista da las societeds

Schlarigna ho üna vita da societeds chi viva. Cò as po charger giò la lista cun tuot las societeds dal lö: Glista da societeds

A+
A-